तुला पाहते रे : रिमेक मालिका

# विकेंडटास्क
# रिमेक ऑफ सिरीयल (२८/११/२५)

तुला पाहते रे : रिमेक मालिका.

पहिला भाग….

इशाची आई…. इशा बरं वाटतंय का? थोडं काही तरी खाऊन घे. खाल्ल्या शिवाय ताकद कशी येईल? आता तू दोन जीवाची आहेस. पोटातल्या बाळाची वाढ कशी होणार अशाने?

इशा… अगं आई… खाल्ल की लगेच मळमळते व उलटी होते. थकले गं मी उलट्या करून.

दोघींचे बोलणे सुरू असताना विक्रांत सर येतात. त्यांना बघून इशा उठायला लागते.

विक्रांत सर….. झोपून रहा. उठू नकोस. डॉक्टरांकडे जायचे आहे का? जास्त त्रास होत असेल तर, चल जाऊन येऊ. हे आईसाहेबांनी चाटण दिले आहे, याच्याने उलट्या कमी होतील. देऊ का?

इशा… नको सर, मी नंतर घेईन.

इशाची आई…. नंतर नको लगेच घे म्हणजे थोडं खाता येईल.

विक्रांत सर तिला चाटण देतात. ती तोंड वेडेवाकडे करत घेते. तिचा चेहरा पाहून सर गालातल्या गालात हसतात.

विक्रांत सर…. तू आता आराम कर. मी परत संध्याकाळी येतो.

इशाची आई… सर, तुमच्या आवडीचा आल्याचा चहा करते बसा.
विक्रांत सर बसतात. तेवढ्यात इशाचे बाबा येतात.

इशाचे बाबा…. काय जावयी बापू, कधी आलात?

विक्रांत सर… आताच आलो. आई साहेबांनी इशासाठी चाटण दिले ते द्यायला आलो होतो. तुम्ही आज दुकानात नाही गेलात?

इशाचे बाबा… गेलो होतो. दुकानातूनच आलो. इशाची काळजी वाटते. हि एकटी किती करणार? तुम्ही माझे दुकान मला परत मिळवून दिलेत खरंच तुमचे खूप उपकार आहेत आमच्यावर. स्वतःचेच दुकान असल्याने केव्हाही येता जाता येते.

इशाची आई दोघांना चहा देते. दोघेही चहा पित गप्पा मारतात.

विक्रांत सर… बाबा.. उपकार कसले, तुमचेच दुकान होते ते. आपल्या राजनंदीनी साडीला मागणी कशी आहे?

इशाचे बाबा… बायका राजनंदीनी साडीचीच मागणी करतात. चांगला प्रतिसाद मिळतोय. डिझायनर साड्यांना जास्त मागणी आहे.

विक्रांत सर… व्वा. छान. यात तुमची मेहनत व बायकांना पटवून द्यायची किमया आहे. यात इशाचा पण खूप मोठा वाटा आहे. चला मी निघतो. एक महत्त्वाची मिटिंग आहे. इशा काही वाटले तर फोन कर. तू खाऊन घे व आराम कर. मी संध्याकाळी येतो.

विक्रांत सर जातात.

………

मालिकेचा दुसरा भाग…..

रात्रीचे आठ साडे आठ वाजलेत. इशा व तिचे आई बाबा जेवायला बसतात तेवढ्यात विक्रांत सर येतात.

विक्रांत सर…. मी पण जेवायला आलो तर चालेल ना?

इशाचे बाबा… या ना सर या.

इशाची आई… तुम्ही फ्रेश व्हा. तोपर्यंत मी शिरा करते.

इशा… आई तू शिरा कर. एकीकडे मी सरांच्या आवडीची कांदा भजी करते.

विक्रांत सर… अहो आई काही करू नका. मी गंमत केली. मिटिंग होती तेव्हा खाणं झालय. तुम्ही जेऊन घ्या.

इशाची आई… शिरा करायला किती वेळ लागतो. लगेच होईल.

इशा… भजी पण पटकन होतील.

इशाचे बाबा… जावयी बापू तुमच्या मुळे मलाही खायला मिळेल.

इशाची आई.. हो… का… बोल्ले….

सगळे हसतात.

एकमेकांना आग्रह करून सगळे जेवतात.

विक्रांत सर … इशा, चल टेरेसवर शतपावली करूया.

इशा… चला… जाऊया.

दोघेही टेरेसवर येतात.

इशा …. सर, आठवतंय का इथेच तुम्ही मला परीक्षेच्या वेळी मॅगी करून खाऊ घातली होती.

विक्रांत सर … हो चांगले आठवते. इथेच तुझे प्राॅब्लेम सोडवले होते. खरंच इशा, काही वेळा हे आपले प्रेम, आपले लग्न स्वप्नवत वाटते. सगळ्या अडीअडचीत तू माझ्या पाठीशी खंबीरपणे उभी राहिलीस. कामगारांचा संप, आणि राजनंदीनी साडीचा खप वाढण्यासाठी तू घेतलेली मेहनत. साडीचे ड्रेस शिऊन द्यायची कल्पना…..

इशा… सर, तुम्ही तुमच्या चांगल्या वागणूकने आई बाबांची मने जिंकली म्हणून आपले लग्न झाले. तुमचा माझ्यावरचा विश्वास मला प्रेरणा देतो.

विक्रांत सर… माझा भूतकाळ कळल्यावर ही तू मागे हटली नाहिस. मला मोठ्या मनाने माफ केलेस. मला वाईट मार्गावरून चांगल्या मार्गावर चालायला लावलेस. आता या वयात प्रेम, लग्न, संसार व आता आपण आईबाबा होणार हे सारे तुझ्या मुळे शक्य झाले.

इशा…. सर, पूरे माझे कौतुक. चला खाली जाऊया. आईबाबा वाट पाहत असतील. तुम्ही घरी जाणार आहात की…. इथेच थांबणार आहात?

विक्रांत सर…. काय करू? तू म्हणशील तसे करीन.

इशा… घरी जा. आईसाहेब वाट पाहत असतील. तसेही मी दोन दिवसात घरी येणारच आहे.

विक्रांत सर… ओके… जशी राणीसरकांची आज्ञा. असे म्हणून दोघेही हसतात व खाली येतात

विक्रांत सर … आईबाबा मी निघतो. आता परवा इशाला घ्यायलाच येईन. इशा… तू तयार रहा. परवा येतो मी घ्यायला.

विक्रांत सर जातात.

दुसरा भाग संपतो.

………