” स्वप्न मोफतच असतात, फक्त त्यांचा पाठलाग करताना किंमत मोजावी लागते “. हे वाक्य वापरून कथा (१०/११/२५)
स्वप्नपूर्ती …….
आशा व विवेक मध्यमवर्गीय कुटुंबातले पण सुशिक्षित व सुसंस्कृत होते. दोघांचा प्रेमविवाह झाला होता. दोघांनाही डॉक्टर व्हायचे होते पण दोघांच्या घरची आर्थिक परिस्थिती तेवढी नसल्याने दोघेही बी. काॅम. झाले. विवेक बॅंकेत लागला व आशा एका खासगी कंपनीत. दोघांनी ठरवले होते की, आपल्याला एकच अपत्य हवे. मुलगा किंवा मुलगी जे असेल त्याला मात्र आपण डॉक्टरच करायचे.
दोघांनी आपली हौसमौज न करता काटकसर करून पैसे जमवायला सुरवात केली. ओव्हर टाईम काम केले. आशा नोकरी करून, घरचे सर्व काम करून, शिकवण्या पण घेत होती. विवेक बॅकेच्या परिक्षा देत असताना अनेक सोसायटींची कामे करून पैसे मिळवत होता. चार वर्षांनी त्यांनी प्रिशाला जन्म दिला. प्रिशा आईबाबां प्रमाणे हुशार व समजूतदार होती. तिच्या शिक्षणासाठी दोघेही खूप मेहनत घेत होते. त्याचा त्यांच्या तब्येतीवर परिणाम होत होता पण ते त्यांना जाणवतही नव्हते. तिने आईबाबांचे स्वप्न पूर्ण केले. ती डॉक्टर झाली, पण तिचे पहिले पेशंट आईबाबाच होते. बाबांना हार्ट अटॅक आला व आईला कॅन्सर. दोघांनी स्वप्न मोफत बघितली होती पण त्याचा पाठलाग करताना त्यांना खूप मोठी किंमत मोजावी लागली होती.
शब्द संख्या : १८२