…. श्री गणेश.. 🙏

***** गणेश*****
आपला गणेश हा सगळ्यांचा जसा लाडका तसाच माझा सुद्धा लाडका देव आहे. गणेश चतुर्थीचा उत्सव हा जगभरात दणक्यात साजरा होतो. त्याची कीर्ती कानाकोपऱ्यात पसरली आहे.
गणेशाचा जन्म म्हणजे एक गुढच आहे. ज्या वेळेस शंकर व पार्वती कैलास पर्वतावर रहात होते त्यावेळेस एके दिवशी भक्ताचे कामासाठी शंकराला बाहेर जावे लागले. पार्वती एकटीच होती. तिला कोणापासून धोका होऊ नये म्हणून तिने अंगावरच्या मळापासून एक सुंदर बालकाची मूर्ती बनवली. व त्यात जीव ओतून त्याचे नामकरण करून’ गणेश’ हे नाव ठेवले व त्याला आपल्या रक्षणासाठी बाहेर दाराशी उभे केले. शंकर कामे आटपून कैलास पर्वतावर परत आले. आपल्या बायकोच्या संरक्षणासाठी या बालकाला ठेवले म्हणून ते क्रोधित झाले. त्यांनी गणेशाला मला आत
जाऊ दे तू बाजूला हो असे म्हटले. गणेशाने त्यांना नकार दिला. त्यांना खूपच राग आला रागा रागाने त्याचे शीर कापून काढले. पार्वतीला खूप राग आला. मी त्याला मुख्य देव म्हणून पुजला आहे. गणेशाला पुन्हा जीवदान द्या. शंकरालाही आपली चूक कळून चुकली व त्याने हत्तीचे शिर कापून आणण्यास सांगून ते गणेशाला लावले. अशा रीतीने “गणेश’ हा’ गजानन’ म्हणून नव रूपात आपल्यासमोर प्रकट झाला.
गौरी गणपती माझ्याकडे असतात. गणेशाची मूर्ती आम्ही वाजत गाजत आणून त्यासाठी आरास करून गणेश चतुर्थीच्या दिवशी त्याची स्थापना करतो. रोज सकाळ संध्याकाळ आरतीला सगळे सोयरे येऊन त्याची मंगलमय शोभा वाढवितात. गौरीचे आवाहन झाल्यावर गणेश गौरीच्या महापूजेच्या दिवशी थाटामाटात तिच्या जवळ येतो. साग्र संगीत पूजा होऊन गौरीचे विसर्जन झाल्यानंतर गणेशाचेही विसर्जन खूप थाटामाटात केले जाते . विसर्जनाच्या वेळेला बहुसंख्य लोकांची उपस्थिती असते. प्रसाद हा महाप्रसादासारखाच असतो.
हसणारा हा पार्वतीचा बाळ, या बाळाला जशी पार्वती मोदकाचा घास भरविते तसाच आमच्याकडे सुद्धा आव्हानाच्या दिवशी व विसर्जनाच्या दिवशी नैवेद्य म्हणून मोदकाचा प्रसाद असतो. पार्वती त्याला आवर्जून म्हणते बाळा, तुझी माता म्हणून मी धन्य झाले. तुझे नाम घेतांना सगळी संकटे दूर होतात. तुझे पिता शंकर आणि भाऊ कार्तिक यांचा तू खूप लाडका आहेस. ती म्हणते बाळा, तू माझ्या उदरी जन्मास आलास हे माझे अहोभाग्य.
बाळ गणेशा,
तुझ्या उत्सवाची जेव्हा तयारी असते तेव्हा आमची नगरी ही सोन्याची होऊन जाते. तुझ्या आगमनाची आम्ही डोळ्यात तेल घालून सदैव वाट पाहतो. तुझे आगमन होताना दिशा दिशात आवाज घुमतो.
श्री गणेशा,
…… तुझीच न्यारी दुनिया……
……. तुझीच ही सारी किमया…..
**** श्री गणेशा तुला वंदन ****🙏🙏
…… अंजली आमलेकर…..