पंढरीची वारी

🚩 पंढरीची वारी 🚩
दिंड्या, ध्वज, पताका घेऊनी,
निघाली वारी, पंढरपुरी |
तुळस घेऊनी,डोईवरी,
निघाली वारी, पंढरपुरी ||

टाळ, मृदुंगाच्या गजरी,
वाचे म्हणे तो हरी हरी|
आठव नाही प्रपंचाचा,
गोडच लागे भाजीभाकरी ||

असो ऊन्ह, अथवा पाऊस,
चिंता देहाची, ना करी |
घाट असो, पाऊलवाट असो,
थके कधी ना वारकरी ||

पडता पायी एकमेकां,
माऊली,म्हणोनी सन्मान करी |
भेटी घडतां एकमेकां,
हरखुनी जाई ,तो वारकरी ||

धनिक असो वा गरीब असो,
भेदभाव ना कधी करी |
प्रत्यय येतो ,माणुसकीचा,
अशी असे ही वारी ||

ओढ लागली भेटीची,
तहानभूकही हा विसरली |
मन हे धावे पुढेपुढे,
पाऊल धावे तदनंतरी ||

हरी नामाच्या भक्तीत रंगून,
भक्तीत रंगे ही वारी |
कळसही दिसता राऊळाचा,
दाटूनी येई कंठ उरी ||

भेटी होता मायबापा,
तृप्त होते वारकरी |
मो‌क्ष न मजला दुसरा ठावे,
धन्य होतसे वारकरी ||
धन्य होतसे वारकरी…….
धन्यवाद🙏
प्रतिभा कुलकर्णी.. पुणे
🚩🚩🚩🚩🚩🚩🚩🚩🚩