कविता

#माझ्यातलीमी
#गणपतीविशेषटास्क
#व्हिडिओटास्क
#स्वरचित कविता

बाप्पांच्या आगमनाची तयारी

बाप्पा येती घराघरातुनी,
सजली अंगण – दारे
चराचरातुनी मनामनातुनी,
उत्साहाचे वारे..!

जास्वंदी अन् कमळ, केवडा,
इवल्या दुर्वा पुढे
बाप्पांचे म्हणे आम्ही मानकरी,
भाव अमुचे चढे..!

पारिजात परि भल्या पहाटे,
टपटप दारी येई
म्हणे बाप्पांच्या चरणी आम्हां,
समर्पणाची घाई..!

मोदक,पेढे, पक्वान्नांची,
एकच गडबड
म्हणती आता बिलकुल नाही,
आम्हाला सवड..!

गौरीनंदन, गजाननाला,
नकोच दुजे काही
मनापासूनी भाव भक्तीची,
द्या हो तुम्ही ग्वाही..!

प्रत्येकाचा असे लाडका,
लहान वा थोर
आशिर्वच भरभरून देई,
श्री विघ्नेश्वर..!

हे सुखकर्ता; सुख दे मजला,
जितुके आवश्यक
समाधान परि सदा अंतरी,
द्यावे मज मुबलक…!!

सौ. सुविद्या करमरकर
पुणे